被網民稱為工聯會「醬爆」嘅立法會議員陸頌雄，過去喺立法會嘅出位言論，令佢被視為「MC興」王國興繼承人，但噚日泛民拉布之時，不但唔見佢反拉布，反而見佢喺立法會走廊不停派布，究竟所為何事？原來陸頌雄用咗幾萬元，整咗過萬塊絲巾質地、成本要五蚊一塊嘅抹眼鏡布，一邊派布一邊大讚塊布用料好，自爆試用咗成個月抹眼鏡，副眼鏡冇刮花後，先敢派畀大家用喎！
其實陸頌雄呢塊布上面，仲印咗5個公仔，當中3個係佢自己扮看更、清潔同維修工人，至於其餘兩個同樣嘅公仔係邊個，陸頌雄形容為「X先生」，話係呢塊布嘅賣點之一，要大家自己領會，補充話：「我冇話佢係鄧家彪啊！」佢呢番苦心不難理解，皆因阿彪若然稍後真係參加新東補選，而佢仲派緊呢啲布嘅話，可能要計入選舉經費咯！