要數今季英超最驚喜嘅隊伍，就梗係要提聯賽排第四嘅屈福特！身位利迷嘅筆者，最有印象當然係上季屈福特作客被紅軍大炒6:1嗰場，客隊當時踢到生氣全無，好難想像佢哋今季脫胎換骨，𠵱家仲變埋Big 4。
其實以中型班嚟講，屈福特今年算買得多人，一共簽咗10個球員。要數最有名嘅就梗係新秀韋曉士，同埋以破球會轉會費紀錄來投嘅安達格雷。但最好表現嘅唔係佢哋，反而係20歲巴西左翼李察利臣。
李察利臣上年踢富明尼斯已經好搶眼，上季屈福特冇常規左翼，有時會用麥巴耶尼安，有時就會出羅拔圖佩雷拉，但前者太獨食，後者就冇咩機會。要數李察利臣今季嘅代表作，當然係八月作客般尼茅夫嗰場，幾次落底搞到對方右閘阿當史密夫頭都暈。李察利臣嘅努力終於喺下半場得到回報，佢再次壓贏阿當史密夫為球隊先開紀錄，賽後更被選為MOM。
讀者可能會問，屈福特上季嘅班底同今季唔差得遠，點解今年勁咁多？查實領隊都係一大因素。上季科里斯成日變陣，試問球員又適唔適應得切？
戰術方面，馬高施華亦都識點用新加盟嘅安達格雷，呢為球員雖然入波唔多，但勝在衝刺力強，令佩雷拉同李察利臣可以切入中路射門，搞到成隊波生晒，今年話唔定可以博個第五，下年隨時有得玩歐洲賽！
文：聰鳴