特首林鄭月娥向年輕人招手，喺5個委員會推出「委員自薦試行計劃」，包括公民教育委員會、創科及再工業化委員會、環境運動委員會、禁毒常務委員會同明年成立嘅青年發展委員會，八方聽聞呢5個委員會都係娥特自行挑選做試點，覺得都係年輕人關注嘅議題。
政府講明歡迎18至35歲嘅青年加入畀意見，初步評估覺得唔少年輕人有興趣，民政事務局局長劉江華噚日喺電台透露，希望本月內推出招募廣告，至於面試安排，料由參與計劃嘅委員會主席同政策局人員負責，名額總數或不多於10幾個，佢話對人選嘅政治立場冇特別考慮，唔會特別吸納有政黨背景嘅年輕人，反而希望有從事文化、藝術同體育嘅人參加。佢仲透露政府計劃喺白石建新嘅體育園，加強體育環境設施。