周三亞冠盃四強次回合，浦和紅鑽（圖）喺主場憑拿費爾達施華一錘定音，1:0小勝上海SP（上海上港），兩回合贏2:1，決賽會面對沙地阿拉伯勁旅希拉爾。
上周日聯對神戶勝利船，拿費爾達施華唔知係真傷定留力，只係以後備身份出場，果然唞足有用，今場波踢到11分鐘，就接應隊友柏木陽介右路角球，頭槌頂破上港大門，助紅鑽1:0領先。
上港雖然有巴西三劍客侯克、奧斯卡杜斯山度士同艾傑臣，但一直無法扳平，其中侯克多次起腳都無功而返，艾傑臣更曾經離門幾碼補中唔到，而紅鑽亦有柏木陽介下半場開角球，槙野智章頭槌頂中楣，增添唔到比數。結果紅鑽就維持呢個戰果，事隔10年後再入亞冠盃決賽，而嗰屆佢哋就喺決賽兩回合擊敗伊朗球會沙巴罕3:1，首次舉起亞冠盃，未知今屆可唔可以重溫舊夢。