毛里裘斯騎師田泰安最近旺番，上周三（11日）晚以「首映」捧走冠忠巴士盃後，今晚（18日）在第二場四班1200米以「旅英公爵」再度取勝，累積連續兩次谷草夜馬建功；「旅英公爵」贏完田草轉谷草連捷，今場單Win及組合獨贏A3分別派62.5及23.5元。
身價370萬的六歲本港拍賣馬「旅英公爵」，上仗勝出田草四班1000米直路賽，亞、季軍「友享友賞」及「航天勇將」再出都能夠贏馬，證明賽事水準好高。果然今次渡江轉戰1200米，「旅英公爵」閘前受落飛黨狙擊，獨贏由原本10倍開外跌到6.2倍開跑着綠燈，可謂風頭十足。
「旅英公爵」陣上留前鬥後，沿途守第六位，直路移出外叠望空一衝過晒，彈到對手甩晒，最後100米時可能田泰安都諗唔到隻馬咁勁，於是匆忙完全停策收韁，但仍大勝3馬位，姿態輕鬆到冇朋友，此駒亦就此完成連捷。而賽後拉頭馬時，有幾位靚女現身凱旋門，搶去不少風頭。
霍利時表示「旅英公爵」上場取勝水準甚高，上季接手初時牠受喘鳴症影響，故未能交出表現，但自從獸醫治好其毛病後，馬兒表現漸重回軌道，今場牠轉跑快活谷很合發揮，與田泰安亦很合拍，遂順利再下一城。
第二場落飛黨大獲全勝，命中6.2倍「旅英公爵」綠燈Win外，還中搭亞軍「美麗之友」39倍啡燈Ｑ，單是這條Ｑ獲利已1,200萬；三、四名分別為「無限欣賞」及「飛馬再威」，四重彩派五萬二千幾。