今年臨尾湊夠數，一年五個八號波，平了過往紀錄，是史上第三個「5×8」（64年和99年）。市民不禁問，李氏力場今何在？答案是，李朝撤資如火如荼，市場估算，撤額已達2600億。
無腦局長貪口爽指，年輕人買唔到樓所以去買車，有多一點空間魂遊。魂遊局長的重點，是將人多車多塞爆濫泊的責任卸晒去年輕車主身上。入後生仔數，成為新政府的一貫手段。林鄭帶頭，下屬跟緊，依法炮製。萬一，涼薄地預測，年輕人買唔到樓買唔到車，會自殺嗎？嘿，未驚過，局長幫特首解畫：生涯規劃要改變吓啦，既然樓車都買唔到，買到個龕喎，靈魂最終都可以出遊㗎啫。政府預告，明年施政派糖，撥N個億去×愛基金，幫年輕人提供低息儲棺材本首期，這項另類首置的最低門檻，是唔准挑戰林鄭條底線。
無車而且魂遊多次都睇唔明樓盤促銷那位董事，點解大老細大筆沽貨離場，他老哥還強勢入市買起中半山五萬蚊一呎的超豪宅？難不成部署五年後出租俾老公話佢黐線做到半夜兩點的林太？唔去日本旅行，唔睇戲而看不出樓價有見底跡象，林鄭會重燃置業希望吧？唔識買廁紙的，叫老公計掂條數，等住接筍貨！