講到失望，首先要有期望，直情好似被欺騙感情一樣！如果唔係就只會好似大家對施政報告嘅睇法一樣，根本就預咗冇好嘢，自然講唔上任何失望，寧願講番性交轉運都仲有啖笑。
好似好悲觀，不過除咗呻吓可以點？另一種悲哀，就係今季睇愛華頓嗰隻！佢哋使咗過億鎊買人，領隊朗奴高文前幾季又有聲有色咁，最緊要係有啲想佢哋突破到Big 6玩晒嘅局面，結果佢哋搞到八場得八分排尾五，連對般尼同白禮頓都踢到一塌糊塗，高文仲做埋下個被炒領隊大熱，越搞越衰。
其實，英超本來就係已經玩咗幾粒鐘嘅大富翁，既得利益者已經埋好位，愛華頓就算上年易主後做咗暴發戶，不過英超大把土豪，形勢已經同十幾年前油王入主車路士時差N倍，要突破Big 6是但一隊唔係易事。
愛華頓都好努力試吓挑戰舊勢力，不過呢個夏天就連自己隻車（盧卡古）都賣埋，而高文喺前鋒位就只係買咗朗尼同辛度拉美利斯，加上季初成隊波大變陣打三後衞，直情新埋班一樣，踢得唔好真係唔奇。
另一隊令人失望嘅就梗係李斯特城，今季就算唔使再踢歐洲賽，但踢咗八場贏得一場，領隊奇治莎士比亞今季坐正之後就冇段好睇，唔好話見番前季嗰隊，直情搞到要護級。可能球會見情況唔多妥，所以早早求變喺周二炒咗莎士比亞咯。
文：飛鴻