八和會館主席汪明荃一向着緊粵劇界，今次佢為粵劇向西九開火。西九之前公佈委任嚟自美國嘅方美昂（Alison Friedman）做表演藝術總監，統領戲曲、舞蹈、戲劇同音樂等團隊，消息一出搞到阿姐個心都離一離，嬲到要喺電台鬧爆，八和會館仲出聲明，直斥西九違反承諾，冇為戲曲中心設獨立藝術總監。
阿姐接受八方訪問時話，西九管理層曾透露過戲曲中心將會有藝術總監主導場館嘅發展同定位，「佢話其他場地都可能唔會有藝術總監，戲曲中心就應該會有藝術總監」。但西九突然請咗位美國人擔任藝術總監，所以阿姐對聘任好愕然，「戲曲係百分百地道嘅表演，業界大部份都唔識講英文，點同佢溝通？」
西九管理局回應指，招聘時已充份考慮所有合適人選，總監履新後會盡快同持份者會面，管理局正公開招聘表演藝術主管（戲曲），為戲曲中心營運等提意見。據了解，方美昂長期喺內地生活，普通話十分流利，係非一般西人。