高鐵一地兩檢角力戰，提早喺噚日於立法會展開，政府調動議程提出中止審議印花稅，讓路確保支持一地兩檢嘅無約束力議案可以喺下周提出，令民主派相當不滿，噚日大會發起拉布戰抗衡，頻頻點人數令建制派要留守議會唔走得。眼見護航大軍「被困」，身為特首辦主任嘅大內總管陳國基（KK）昨午親臨立會打氣，知道議員無啖好食時，仲自掏腰包買蛋撻，出錢又出力「勞軍」，無非要確保呢場大仗萬無一失。
自掏腰包又出力
其實KK昨午現身立法會為議員打氣時，唔少建制議員即時「申訴」未食飯，結果原本兩手揈揈嘅佢叫特別助理李惠買10打蛋撻送到立法會。咁又係，冇氣力又點打仗？戰將嘅肚皮，不可忽視，難怪唔少建制議員即刻大啖食。
KK呢次係自掏腰包請議員食撻，就連周一喺禮賓府請記者食嘅蛋卷，原來都係佢自己出錢，透露當日唔想記者日曬雨淋，所以向娥特建議不如搭個篷、畀記者入禮賓府等，娥特聽完一口應承話「好！」結果就成事，認為事件顯示出娥特善待傳媒嘅「管治新風格」，希望日後採訪時都可以畀傳媒好似上次咁入禮賓府等。而娥特其後罕有出嚟同傳媒講嘢，KK就話係娥特個人決定。
下周三嘅一地兩檢辯論，娥班子有乜戰術？KK重申，方案獲唔少市民支持，希望獲立會呢個民意機關支持後，即刻開展「三步走」工作，呼籲議員唔好拉布。咁娥特會唔會親臨打氣？KK話會同娥特反映喎！
李八方