利物浦周二喺歐聯分組賽E組遠征斯洛文尼亞嘅馬里博爾，初時以為紅軍近況麻麻加上長途跋涉，贏到波已經好好，點知利記突然發威，派足對手七隻光蛋，更加打破多項紀錄，其實單係個比數，已經嚇親唔少瞓咗無睇波嘅球迷；而同日出場嘅英超球隊曼城同熱刺，就分別擊敗拿玻里同賽和皇馬。截至周二英超球隊喺今屆歐聯仍然保持不敗，認真威水！
高帥：寫下我哋歷史
先講紅軍，今場雖然作客弱隊，但高路普排陣可謂誠意十足，最主要嘅變動只係用占士米拿取代咗隊長「神軒」。開賽四分鐘，已經五場無波入嘅前鋒羅拔圖法明奴終於打破入球荒，之後就輪到菲臘比古天奴同穆罕默德沙拿發威；被人寸話係「黑腳」嘅阿歷士張伯倫下半場後備上陣，86分鐘射入加盟紅軍後首個入球，加上後生仔阿歷山大阿諾特臨完場遠射得手，湊夠七隻光蛋。
賽後高路普就話：「我地展現出利物浦係一支幾咁好嘅球隊，今場大勝將可以帶俾球員信心。」何止信心返晒嚟呀！利物浦仲打破咗隊史喺歐洲賽事客場最大勝仗嘅紀錄，亦係第一支喺歐聯（包括前身歐冠盃）客場贏到7:0嘅英格蘭球隊，只差一球就可以平咗自己喺2007年11月，主場8:0狂數比錫達斯嘅歐聯最大勝仗紀錄。難怪高路普亦都話：「贏7:0係非常罕見，好開心我哋可以寫下一段屬於我哋自己嘅歷史。」
而英超一哥曼城就繼續強勢，主場迎戰意甲一哥拿玻里，繼續憑住中場奇雲迪布尼好似「沙維上身」嘅表現，開波初段就由史達寧及加比爾捷西斯四分鐘內連入兩球。不過曼城後防偶爾發夢，送咗兩球12碼畀對手，可惜迪布尼嘅國家隊隊友梅頓斯唔生性，射失咗一球，令到哥迪奧拿帶領嘅球隊可以繼續贏波。