風中風中，心裏冷風，吹失了夢……身在添馬嘅政府官員，近日有冇覺得凍咗好多？原來特區政府「計劃」嘅3.11補選日期，惹嚟建制派不滿，唔少人更向西環名為申訴實為打小報告，據聞西邊颱風已經吹到添馬娥班子，唔知林鄭同政制及內地事務局局長聶德權點樣喺壓力下，抵擋西風，免讓3.11補選一切隨風？
建制派不滿撞正兩會
林鄭上場後處處展示想政府「重回正軌」嘅作風，例如冇理建制派要求，按正常程序將兩次DQ案觸發嘅補選分開處理，首場喺3月11日進行，令建制派要乘人之危搶灘難度大咗，難怪當日補選日子一出，建制派高調反枱堅持合併，又話長毛等人嘅上訴可能好快搞掂，唔使咁快定補選日子。
查實除咗分開補選令建制冇甜頭而嬲豬，亦因為補選日撞正北京開兩會而令唔少人不滿，皆因人大同政協3月初起留守北京，當中唔少人係建制選舉操盤人，而就算佢哋遙控操盤，至少投票日都要返港，難免怪責政府只顧住民主派訴求，冇理過建制派嘅感受。