麥雅緻剖腹誕細仔張頴康含淚:辛苦晒老婆

麥雅緻剖腹誕細仔
張頴康含淚:辛苦晒老婆

港姐出身的36歲靚媽麥雅緻,五年前與張頴康結婚後生下囡囡雅喬(小豆),現已3歲。昨日張頴康一家三口再添一名成員,麥雅緻為老公誕下7磅幾B仔,一仔一女剛湊成一個好字。

麥雅緻早前穿婚紗跟老公張頴康和囡囡影孕照留念。互聯網圖片

張頴康昨笑指被太太麥雅緻擺上枱,在拍照期間突然要他除衫擺甫士。互聯網圖片

麥雅緻日前在fb呻要忍口不能食大閘蟹,惟有益老公。

幫手剪臍帶

原本麥雅緻的預產期是本月底,但張頴康昨日上午突然在facebook宣佈BB已經出世,並上載了一張與太太及B仔合照,留言:「小花生出咗世喇!辛苦晒老婆喇!老婆,我愛你!」相中肥嘟嘟的小花生瞇埋眼乖乖睡覺,十分可愛。
再做爹哋的張頴康,心情當然勁興奮,他昨在電話中說:「BB重7磅幾,其實我哋都預咗係開刀生嘅,今次我都有入產房陪太太生,始終呢個係手術,要開刀,陪太太入去嘅話,太太會安心啲。同之前太太生小豆一樣,我都有幫手剪臍帶,總之家姐出世時做嘅嘢,細佬出世都會全部照做,唔會偏心嘅。」

麥雅緻昨日為張頴康誕下7磅多的「小花生」。

打算餵人奶

問到張頴康聽到B仔出世時的喊聲,是否跟太太感動落淚?他說:「今次我比上一次好少少,只係眼濕濕啫,但我老婆就喊得好犀利,佢好眼淺㗎咋。」張頴康指未知BB是否要照燈,所以暫未知太太和BB何時出院。問到會否餵人奶時,張頴康說:「係呀,小豆餵人奶餵到一歲,好健康冇乜病痛,所以小花生都會一樣,係辛苦咗我老婆啫,媽咪真係好偉大。」
此外,前晚張頴康在fb上載了一輯麥雅緻孕照及與囡囡「一家四口」溫馨照,相中的麥雅緻穿婚紗晒巨肚,女兒就靠在媽咪肚子上,十分溫馨。
採訪:魯吉