新世界（017）主席、人稱「純官」的鄭家純，自從今年初中風之後，就一直無公開露面，每次疑似會有純官出現嘅活動，都有一大批傳媒追問純官幾時強勢復出。噚日同系的新創建（659）發佈2017年年報，當中就披露身為主席既純官，今年7次董事會會議中，只係出席過一次，年報仲刊登咗有一張有純官同其他董事會成員，一齊出席會議時候嘅相片。唔通純官已經出山開工了？
正當華華驚嘆純官外型仲係咁飽滿、無咩點變嘅時候，再睇真啲，先發現原來呢張係舊相，重用咗3年，即係2015、2016及2017財年都係用緊同一張相。唔單止重用，華華仲發現，集團2015年第一次用呢張相時，明明有11人，但隨後兩年就有一個慘被強行cut走，真係環保。
至於翻查同系公司，周大福（1929）今年財年年報入面，純官就喺4次董事會會議中出席3次會議，但就未有拍照喇。
李華華