九月二十七日本欄提及中環中心大樓一樓商場內之郵政局，因虧損「四百元」而會停業，虧損「四百元」，好似係大笑話！但各報章皆有報道，資料來源係中西區區議會討論文件。有老友來電話：「左丁山你係唔係講笑話呀？蝕四百蚊咁少就話要執咗中環中心郵局，郵政署真係冇鬼用！」唔係講笑噃，新聞報導確實如此！
唉吔吔，點知呢件係特朗普口中念念有詞嘅Fake News。由於電郵地址內滿是垃圾郵件，隔咗好多日先至收到由蘋果傳來郵政署高級經理（公共關係）蘇慧雯女士嘅電郵，日期係九月二十七日，內容如下：「本署於本年四月提交給中西區區議會有關關閉皇后大道郵局的建議，及後發現討論文件中，將2015/16年度虧損超過四百萬元誤寫為2015/16年度虧損超過四百元。本署已聯絡中西區區議會安排修正相關文件。」
吓，咁都得，虧損四百萬元變為四百元，呢個手民之誤，非常值錢，可能係香港一個紀錄。但疑問來了，點解我地市民唔係一早知道呢個手誤嘅？莫非郵政局冇向傳媒澄清？還是傳媒全無跟進報導？左丁山跟新聞，呢次跟錯咗，要向郵政署致歉，但也須提醒郵政署高官，香港政壇甚多風雨，任何文件交俾區議會、立法會，或公開發佈之前，啲上級高官唔該睇清睇楚，千萬不能有錯誤數字出街，不慎出咗街先至發現有錯，唔該第一時間高調更正，通知全世界。前任郵政署署長丁葉燕薇在今年3月20日林鄭月娥當選後出任候任特首辦公室秘書長，7月1日起出任特首辦常任秘書長，應該係林鄭之內圍團隊成員，但郵政署之「四百元」虧損笑話，關唔關佢事呢？是一個謎。現任郵政署署長梁松泰以前係慶典統籌辦公室主任，睇吓有冇新作為啦。郵政署做事不起眼，近年備受快遞業摧殘，逼到冇啖好食，但署長一職就似乎係官星位噃，譬如以前蔣任宏署長退任就做咗私隱專員，之後坐呢個位嘅張雲正更巴閉，坐直升機跳幾級成為公務員事務局局長，然後丁葉燕薇又成為新特首林鄭之信任人物，做咗特首辦常秘。梁松泰會唔會呢次執到條好籌，三四年後又升做大官呢？郵差其實係受市民信賴程度極高之人，睇見郵政署虧本捱打，市民都唔會爽神，如果林鄭政府真要為人民服務的話，關閉郵政局要極度慎重考慮！