Formula E香港站噚日開記招公佈詳情，落實12月3日同4日喺中環海濱區進行兩日賽事，亦係第四季「國際汽車聯電動方程式賽車錦標賽」首站賽事，不過，兩日賽事冇安排副賽，所以香港車手就冇機會喺主場出戰。
香港舊年首辦Formula E分站賽事，吸引到25,000名車迷現場觀戰，仲有數以萬計車迷透過電視睇直播，今屆賽事主觀眾席座位更加到7,400個，場內仲有3,000平方呎嘅E-Village，有唔同互動遊戲同娛樂節目。香港站賽事CEO方仁傑就話，舊年賽事安排上唔夠緊湊，搞到有車迷提早離場，賽會決定兩日都鬥Formula E，車隊先進行排位賽，之後進行正賽。
至於賽事有乜車隊參賽仲要等賽會最後公佈，奧迪、雷諾同積架等10隊，共20位車手角逐10站賽事。不過，今屆不設電動房車賽等賽事，噚日專程到場、啱啱再做爸爸嘅歐陽若曦同方駿宇（小圖）等本地車手就冇得喺中環鬥車。賽事票價分$2,380同$2,880，另設兩日套票$4,780，亦有特惠票$1,190，詳情可登入 http://hkformulae.com/tickets 。