Rooftopping（極限攝影）環球流行，唔少極限攝影睇中香港建築密度高，人煙稠密，鍾意嚟香港挑戰唔同建築物，拍下既驚險又迷人嘅片段。最近網上流傳一條片段，相信喺中環一帶拍攝，片中一位俄羅斯金髮女同型男，企喺地盤內嘅一架紅色吊機上面，片段估計係以航拍拍攝，異國情侶溫馨額貼額，背景見到ifc等建築物及維港景色，加上好多幢大廈都喺兩人腳下，構圖又確係浪漫動人。
另一條片就見到兩人坐喺吊機上，用自拍棍自拍，維港景色同埋腳下建築物都攝入鏡頭之內，仲有一條片就見到兩個人徒手爬上吊機，兩人都神情輕鬆，咩攀爬工具都冇戴，就信心滿滿向上爬。雖然登頂刺激好玩，但始終有危險性，而且非法闖入私人建築，都有法律風險㗎！