逾50萬羅興亞人最近由緬甸逃難至孟加拉，逼爆當地難民營，衞生情況惡劣，41歲註冊護士、無國界醫生救援人員趙卓邦上月到咗當地協助救援，3星期內先後喺溫吉帕朗臨時營地同沙波伊爾德威普嘅難民上岸點幫手，過往曾到戰區做救援嘅阿邦話，今次任務有別於喺也門戰區傷者血肉模糊嘅情況，睇見抵岸嘅難民乜都冇，喪夫或子嘅婦女帶住小朋友倉皇走難，悲慘故事令人好sad。
阿邦噚日同傳媒分享，原來佢每日要坐一個鐘頭車，再徒步走過泥濘地約一小時，先到難民營診所。營內冇足夠食水同食物，難民要自己挖井取水，結果診所有好多腹瀉個案，亦有病童嚴重缺水要緊急進行靜脈輸液等，由於唔少難民唔識字，教佢哋服藥時都要畫圖示意。佢話營地環境惡劣，急須擴大人道救援。