北韓作為神秘國度，當然冇賭錢呢啲咁嘅野，據報捉到要拉去勞改3年！不過領袖金正恩為咗搵外匯，決定開放賭馬！但係…北韓有賽馬咩？據美國《CNBC》報導，北韓正努力發展賭馬業，仲有條片睇吓佢哋跑馬！
好喇一開閘嘅時候，點解得兩隻馬跳出黎嘅？原來係其他馬lag機，等多一兩秒都陸續跳晒出嚟，十隻八隻馬幾乎清一色係灰馬白馬。以北韓嘅國情，白馬係金氏家族專用，睇嚟賽馬業喺北韓都幾崇高呀！
而且片段仲見到「肥仔恩」去睇沙圈，仲笑得好開心添！據當地《KCNA》新聞報導，馬場Mirim Horse Riding Club位於北韓首都平壤附近，下禮拜日會有賽事舉行！12歲以上嘅人就可以入場，北韓中央電視台就形容話政府靠中間抽水來賺錢。
呢壇嘢唔知搞唔搞得成啦，不過據報北韓仲發展緊泳池同其他康樂設施，連同原本有嘅遊樂場、主題樂園咁，都係肥仔恩為咗搵多啲外匯，主要係美金同人仔啦，用嚟舒緩國際經濟制裁嘅方法。