騎師算係一個剛陽味較重嘅行業，所以當有女騎師出道，甚至闖出名堂，自然就會吸引傳媒爭相報道，可惜今季本港唯一女將蔣嘉琦早前受手指舊患影響，莫講想上陣殺敵，就連喺晨課操馬，醫生都建議唔好做。
不過近日就傳來好消息，呢位24歲小妹已經重新上回馬鞍，已喺騎術學校恢復騎馬，慢慢拾回昔日策騎感覺，相信嘉琦BB好快就會喺晨課出現，繼而在馬場散發英姿。
其實嘉琦BB休養期間，絕對冇偷懶，除咗喺中秋節做義工，免費派月餅俾基層老人，仲周不時幫師傅呂健威喺晨課打點一切，率先學習廐務。或者從中轉變崗位，或另外有所得著，從而令自己騎術進步。