鄉議局噚日開會，討論涉及元朗唐人新村嘅「分區計劃大綱草圖」時，唔少元朗鄉紳強烈反彈，早前話要對港獨人士「殺無赦」嘅屏山鄉鄉事委員會主席曾樹和，再語出驚人，話唔妥政府文件寫法，揚言不排除放火燒車胎「作反」，似乎未有被殺無赦事件影響佢一向有嘅「激情」作風。
鄧賀年一講政府就爆粗
元朗錦田鄉事委員會主席鄧賀年亦忍唔住就此開會時爆粗，警告政府推動計劃前，若唔首先搞掂元朗鄉村交通問題，唔使諗做得成，其後越講越激動，話政府出幾千億元活化村落，「只係畀外人踩入條村度」，仲搬埋習總出嚟，話習總都話偏遠鄉村都要有路同有互聯網，「保育呢兩個字死緊嘅，（政府）一保育你啲地，你X緊街，唔使郁都得嘞，地區凍結埋仲X街」。