美職聯球隊奧蘭多城，喺周日進行常規賽最後一場主場比賽。亦係昔日AC米蘭當家球星、家陣已經35歲嘅巴西球星卡卡，最後一次喺奧城主場球迷面前獻技。
卡卡熱身時已得到觀眾熱烈歡呼，開賽前更帶住一對囝囡步出球場，接受球迷掌聲，可能因為場面太過感人，又或者卡卡已經知道，今場會係自己最後一次嘅美職比賽，激動得落下男兒淚！美中不足嘅係，卡卡雖然踢足90分鐘依舊拼盡全力，但場波最終都係輸咗，無法喺25,166名球迷面前用勝利告別。
身體不如前 暗示會掛靴
卡卡喺上星期宣佈，效力咗奧蘭多城三年之後唔會再續約，而奧城亦無緣躋身季後賽，換言之今場波係佢最後一次代表球隊主場作賽。佢話自己嘅身體已經唔可以應付劇烈比賽，每次比賽完都周身痛，恢復唔到最佳狀態，搞到對足球嘅熱情都大減咁話，可能暗示會高掛球靴。雖然奧蘭多城仲有一場作客賽事，但卡卡已經表明唔會隨隊，所以周日嘅賽事，好可能成為卡卡嘅最後一戰。
奧蘭多城教練卡雷斯話，賽前已要求球員注專比賽，希望以勝利嚟送別卡卡，可惜最終都係唔達標，令球迷失望；後衞史柏達就話今場嘅賽果，無損卡卡職業生涯嘅偉大。而卡卡賽後就眼泛淚光咁接受訪問：「今場係我代表球會最後一場正式比賽，所以比較激動，以後我都會用另一個身份，繼續同球會並肩作戰。感謝過去三年係呢度發生嘅一切，我永遠都係一隻獅子（奧蘭多城隊會徽）。」有球迷就笑言，最後一個能夠在美斯、C朗兩個外星人面前，舉起金球獎嘅地球人都要退落嚟，慨歎「歲月不留人」啊！
