原中西區東華選區議員嘅民建聯蕭嘉怡，因加入政府做政務司長政助而請辭，出缺議席會喺11月26日補選。最近該區除咗「鬼影」幢幢，被指「扮民主派𠝹票」嘅工黨前成員劉舒燕突然報名參選，同民主黨伍凱欣以及獲建制派支持嘅呂錦強競爭外，連區內嘅盂蘭會門口都好詭異，出現一式一樣17張頭像海報（圖），睇真啲原來係基督徒呂錦強嚟㗎喎。
有眼利街坊發現，呢個咁特別嘅助選方式，當年蕭嘉怡都用過，仲貼咗34張，當時網民已覺得「好猛」，八方問過呂錦強，佢話做宣傳睇唔到同自己信仰有乜衝突，又話舖頭畀佢貼咁多，唔代表舖頭老闆同員工會投票支持佢。至於點睇自己同蕭嘉怡一樣獲盂蘭會寵幸？佢話「冇考究」喎。