特首林鄭月娥嘅處女作，大手筆喺各方面派糖，坊間普遍評價不俗，相信對要求極高嘅林鄭嚟講算達標，難怪近日唔少人話阿姐笑容多番，亦係時候要鬆鬆。原來林鄭上周五行程好緊密，除咗朝早要出席電台節目，晚上去公專聯晚宴撐場外，仲忙裏偷閒到科學館參觀「永生傳說──透視古埃及文明」展覽，寓放鬆之餘connect市民。
呢個木乃伊展一直好受市民歡迎，特別之處係科學館用咗3D立體投影等技術介紹相關資料，積極推動STEM教育，難怪林鄭都畀like！
據知當日林鄭邊行邊被市民集郵，其間遇上攞住工作紙嘅學生，林鄭都有問佢哋係咪做project，又叫佢哋快啲抄資料，點知學生哥霸氣回應：「我哋全部都做晒嘞」令向來厲害嘅林鄭不得不講句「犀利」！