等咗咁耐，皇家馬德里王牌前鋒基斯坦奴朗拿度（C朗）終於喺今季西甲開齋。C朗喺之前上陣三場聯賽270分鐘都冇波入，已經刷新咗佢投身西甲以嚟，開季最長冇波入場數紀錄。到上周六皇馬作客基達菲，C朗終於打破入球荒，重要係非常關鍵，臨完場前入波奠勝，助球隊以2:1險勝。同日巴塞隆拿作客只能以1:1逼和馬德里體育會，今季首次喺西甲失分，各項賽事九連勝斷纜。
賓施馬復出先開紀錄
皇馬今役有賓施馬復任正選，夥拍C朗同埋馬高阿辛斯奧攻堅，而加里夫巴利就繼續養傷，中場艾斯高則先踢後備。基達菲初段搶攻效果一般，反而皇馬攻勢更到肉。踢至39分鐘，賓施馬把握敵軍失誤，一個箭步上前扭過另一名敵衞，再喺禁區內熨射得手，皇馬領先1:0完半場。換邊後，基達菲56分鐘由佐治摩連拿追平，但C朗喺完場前五分鐘接應長傳禁區半窩利抽入，攞到個人今季西甲首球，亦幫皇馬奠定勝局。值得一提嘅係，今場波係主帥施丹踏入帥壇嘅第100場賽事，幸以勝利告終。賽後施丹亦戥C朗高興：「呢一個入波對佢好重要，而我亦都覺得好開心。」隊友馬些路亦都話:「每當球會需要C朗嘅時候，佢總會喺適當嘅時候出現。」
巴塞逼和馬體會連勝斷纜
至於另一場西甲大戰，由馬體會主場迎戰巴塞。馬體會21分鐘先憑沙奧尼古斯嘅入波領先1:0。巴塞下半場向馬體會連番施壓，美斯喺56分鐘主射罰球繞過人牆，但皮球中右柱彈出。直至81分鐘，巴塞前鋒蘇亞雷斯接應沙治羅拔圖傳送頂入，以1:1逼和馬體會。巴塞失分後八戰得七勝一和得22分續居西甲榜首，而皇馬就以五勝兩和一負得17分暫列次席（未計周日戰果）。
賽事亦發生一段小插曲，事緣蘇亞雷斯入波之後走去馬體會嘅粉絲區，做咗一個扮聽聲嘅慶祝手勢，所以畀好多人話佢係挑釁。巴塞教練華維迪就力撐阿蘇，又大讚佢表現好：「我覺得佢冇違反體育道德。好明顯，前鋒為咗入波而生存，而入波亦能夠畀到佢哋信心。阿蘇嘅入波好美妙，呢球亦都畀到佢信心，等佢之後可以繼續入多啲波。」