卡努襲港，天文台一早掛咗8號風球，有人冒險去海灘衝浪，怕危險又唔想去到咁遠？不如近近哋試吓落樓下球場玩喇！唔係講笑，噚日下午真係有位「風帆神之男」喺慈雲山中央球場「陸上行舟」（圖），仲滑足大半個足球場！
從片段可見，呢位「慈雲山李麗珊」唔止裝備十足，仲着晒黑色滑水裝，由球場左邊滑去右邊、跣過龍門，有時跌咗個帆，但又起番身再滑，好似喺海上乘風破「浪」咁，好有毅力㗎。當時風勢夠大，雨勢時大時細，但地面未至於太多水，見佢滑到成半個7人硬地球場，真係幾厲害，睇真啲板下似乎有轆喎，難怪滑得咁順。有網民覺得好有趣，大讚佢有創意又玩得安全，唔知政府會唔會考慮開個陸上風帆場呢？