特首林鄭月娥參選特首政綱提到「完成全面檢視政策前，會擱置小三TSA」，但佢交代新政府百日工作進展嘅文件以及施政報告，都未見提及擱置TSA嘅選舉承諾。
教協喺8號波下向林鄭追數，發新聞稿批評現時檢討TSA嘅委員會缺乏代表性，部份成員仲有利益衝突之嫌，希望娥特兌現選舉承諾，就有關議題成立包括不同持份者同意見嘅委員會檢討，未有結果前停考小三TSA。
教協同時話林鄭競選期間明確表明制訂幼師薪級表，但施政報告就「走數」成為「探討設立幼師薪級表的可行性」，質疑同前特首梁振英參選政綱承諾「盡快實施15年免費教育」，最後卻只喺施政報告提出「成立專責委員會研究可行性」如出一轍，希望林鄭盡快提出研究嘅具體方案同時間表。