九屆香港冠軍練馬師上季勝出94場頭馬、打破單季紀錄的蔡約翰，今季初表現慢熱，截至剛周三（11日）夜馬，只憑「首映」一駒贏過兩場頭馬，令人意外，但相信呢段低潮即將告一段落。
本月22日沙田馬場將上演1200米二級賽精英碗，蔡約翰廄內一對全港最高分馬，俱評128分的「澳斯卡」同「紅衣醒神」均會出戰，而且據知配搭已定，「澳斯卡」用雷神莫雷拉，「紅衣醒神」就有新人選，就係「炒飯哥」羅理雅。
「紅衣醒神」及「澳斯卡」剛周五（13日）分別由羅理雅和雷神同組試1050米泥地大閘，結果均有好走勢，「紅衣醒神」跟前跑末段維持勁勢勝出，「澳斯卡」則後上如飛得第二，雙雙已準備就緒，操起狀態。
羅理雅來港發展以來成績不俗，但騎到120分以上之頂級馬機會不多，今次接手「紅衣醒神」可謂一大突破，炒飯哥話「紅衣醒神」本月初由雷神角逐完1000米國慶盃熱身後，戰鬥力肯定會提升，計馬分量當然夠贏，只係佢同精英碗主要對手「幸運如意」都要負重磅，不能說全無影響，預期賽事會非常均勢。