2開有條路！這天（14日）沙田第五場四班1400米，同第四場一樣都係由2號馬勝出，主角亦都是苗禮德馬房，轄下五歲馬「常拼常勝」於第五場夥拍史卓豐，藉1檔沿途前置，直路突圍擊敗放頭馬「美好家園」贏1.25馬位，大熱Win及組合獨贏A3分別派46.5及15.5元。
這天跑罷上半場，苗禮德連環出擊下，憑一對2號熱門頭馬「龍城猛將」及「常拼常勝」一泥一草，將第四口孖寶據為己有，每注派213元。苗禮德同時錄得季內首次沙田起孖，可喜可賀。
無巧不成話，「龍城猛將」同「常拼常勝」除咗馬號相同，今仗都係季內初出即勝，並從而完成跨季連捷，馬房部署可謂恰到好處。
曾在接受訪問時直言本身好喜歡賭馬，自己亦養有團體馬「快樂實在」的姑姑陳玉蓮，雖然今日「快樂實在」沒有上陣，但陳玉蓮仍和好友伍燕梅到場，一起支持馬主梁麟一家的「常拼常勝」，結果大風下被吹起秀髮的陳玉蓮笑晒口拉頭馬，睇怕姑姑都有唔少斬獲。
第五場二至四名分別為「美好家園」、「開懷大少」及「大富大貴」，四重彩派一萬八千幾。
至於史卓豐贏「常拼常勝」前，已憑第一場同樣大熱，羅富全馬房的「喜之星」食出全日頭糊，做了大熱保衛者。