澳洲籍騎師這天（14日）威震沙田，跑到第八場為止，僅第二場頭馬「駕悅」由華人騎師楊明綸勝出，其餘七Win均由澳將經手，包括夥拍羅理雅爆冷勝出第八場三班1000米直路賽的「祥勝駿駒」。呢匹何良賽駒排第14檔後上建功，單Win及組合獨贏A2分別派165及50.5元。
不過，羅理雅今場贏來大話夾好彩，須知潘頓騎住大熱門莎莎老闆郭少明愛駒，3.6倍的大熱門「美麗皇牌」，沿途貼住外欄越放越有，唔使打鞭，最後30米左右仍佔先，睇怕應贏梗之際，臨近衝線時「美麗皇牌」卻突然來個俯首前跪，狀似跛腳，搞到始料未及的潘頓手忙腳亂，大失平衡，被迫抽住座騎收慢，由贏變輸，但「美麗皇牌」仍頂到亞軍。
相反「祥勝駿駒」漁人得利，乘勢將「美麗皇牌」追過而贏馬，可謂有人快樂有人愁。不但「美麗皇牌」廐主告東尼仲未打開今季沙田勝門，「美麗皇牌」本身亦傷勢太重，過終點後不久潘頓已落馬，現場攝記指馬兒的左前腳受創彎曲了，馬會受薪董事其後亦證實「美麗皇牌」左前腳嚴重受傷，已遭人道毀滅。
今場直路賽由四匹最外檔馬包辦，其中14檔「祥勝駿駒」跑第一，二至四名順序為13檔「美麗皇牌」、11檔「運財童子」及12檔「好客本色」，四重彩派七萬二千幾。
除了贏「祥勝駿駒」外，羅理雅連同第四場泥地贏熱門「龍城猛將」，已是連續第二個賽日起孖，兼且在今期騎師王未輸晒，仲有得同揸住三Win的史卓豐埋身肉搏。