師奶睇師政報告，眼尖發現，自稱過去一百日，日日為香港籌謀的林師奶，抽空set了個靚頭，精心做了紅色highlight。也許，紅運當頭是打贏港股「逢七必跌」的魔咒的必須祝福！林師奶還搶眼地一日三度換裝，女人當政，突破董、曾、梁三個中佬格局，令煲慣韓劇的死忠CCTVB師奶很受落，呆在電視前睇直播，師奶歎住奶茶對口才了得的奶媽讚不絕口：嘩，真係好似去飲，新人都換幾套衫呀嘛，只差無隻見得吓人的巨鑽傍身啫。
踎低身，塞五百蚊落來港搵食的內地乞丐大嬸手中那一幕，滑稽得離地。今日的林鄭，以特首一嘟大開金庫之閘，明益市民，搭地鐵每月補貼最高上限三百大元！每年耗庫房廿億。對比豪擲九百億落西九高鐵這條回本無期的冤枉賬，打工仔無得計，蚊髀與牛髀。每月補貼三嚿水，唔去旅行，唔睇戲，係咪可以上到林鄭的首置盤？重燃置業希望，林鄭講了N次，年輕人越聽越不安。日本野村分析，香港爆煲燈已經亮起了最高警戒，比中國更高危。市場一旦逆轉，林鄭面不改容卸膊走數，理所當然。重燃希望，是施政偽語；失望但不能絕望，才是社會真正體感。