綽號「香港戴圖理」的43歲華人騎師賴維銘，由於年紀不輕、之前多次傷患及所獲支持度不多等因素，其策騎前景備受睇淡，但賴仔真的非常爭氣，本周三晚（11日）策20倍冷馬「君子承諾」，力挫潘頓的「事必獲利」勝出，非常精采。加上9月中贏「競駿時代」，今季賴仔已有兩Win，仲多過得一Win的韋達，已經算好難得。
最重要賴維銘唔似只得一啖虛火，陸續有實力馬支持，尤其大倉蘇偉賢，賴仔幫佢贏「競駿時代」，見賴仔騎得咁好，今期(14日)沙田第二場四班1400米，又向賴仔提供「星二快勝」攜手出擊。
「星二快勝」上仗由文家良轉投蘇偉賢初出，在田草1200米由賴仔35倍跑第三，首次上名，表現大有進步，今次沒有換人，賴仔亦很珍惜此駒，今朝(13日)特意親自在內圈快踱一課，作為最後備戰，晨操專家積奇指馬兒身輕步爽，狀態正與日俱增。
冇乜前速後上型的「星二快勝」今仗增程跑1400米更合，而且抽4檔好檔，賴維銘繼續有馬贏，絕對非天方夜譚。