全新旅遊專頁，即like籽想旅行：https://fb.me/travel.appleseed
如果你鍾意刺激，十月是去新加坡環球影城的最佳時機。日間，可以挑戰全球最高雙軌過山車、超有電影感的變形金剛3D對決；夜晚，就是群魔出動的時候。今年的「萬聖節驚魂夜」以七宗罪為主題，有五間鬼屋和兩個戶外恐怖區域。最大特點是嘩鬼演員超級多，經常無間斷重複前後左右瘋狂包抄突擊唔畀你走，嚇到人個心都離一離呀！
有鬼的地方，就有鬼王。記者好彩玩鬼屋遇到鬼王潘紹聰。鬼王教路，行鬼屋最緊要兩手撥一撥、再蹲下少少，驚嚇度會減一些。不過鬼王贈大家兩句：「其實鬼屋可能真係有鬼，唔多唔少都有，我都聽過唔少。遇唔遇到，就要睇睇你時運......」自命時運高的朋友，以下精選鬼屋介紹可以睇埋落去。
1.鬼屋：詛咒
最驚嚇、最邪門鬼屋要數以巫術為題的鬼屋「詛咒」，巫術蠱毒巫醫死屍一屋都是。如果本身聽得東南亞鬼古太多，勸你不要進去。怕你自動腦補過頭心靈承受不到。
2.恐怖區：開心驚嚇日
好殘忍的主題。將原本美好快樂的童話或者節日大肆惡搞，聖誕老人變殺人狂魔、愛麗絲迷宮隱身邪惡兔女郎、連復活蛋都變邪惡。童年回憶大崩壞，記者表示玻璃心碎到一地都係。恐怖區設於戶外，地方不細四周又黑，兜兜轉轉行來行去總是走不出驚嚇範圍。迷失，比一切鬼怪更可怕。
3.鬼屋：邪惡狂想/猛鬼商場
兩間的驚嚇度都不算超標但十級靚。邪惡狂想大玩視覺效果，光影特效令人眼前一亮非常迷幻。猛鬼商場裝修認真細緻，明明是鬼屋但入面有齊戲院餐廳超市各種場景，佈置滿分。受得住就不要行太快，值得慢慢行慢慢睇。
同場還有不少表演，「恐怖區：罪惡聖域」會不定時突然上演打打殺殺的血腥戲碼，甚有驚喜。「血腥演唱會」一般，時間緊逼可以忽略不理，但「邪惡實驗室」是回本之作，包含幾種難得一見的技藝，去到就千萬不要錯過。
記者：李珮禎
攝影：鄧鴻欣