世盃外南美洲區日前最後階段鬥得燦爛，各隊為出線乜招都出晒，先有哥倫比亞隊長法卡奧同秘魯球員密斟，踢默契波味濃，今日英國《太陽報》再爆出，指巴拉圭主場0:1輸畀委內瑞拉嘅前一晚，有些微晉級希望嘅巴拉圭出動殺手鐧，搵多名妓女去到委國大軍住宿嘅酒店大堂，務求引誘委軍球員兼盡情消耗佢哋嘅精力。好彩委內瑞拉雖然一早已經出咗局，不過班球員夠專業不為所動，結果爆冷贏1:0。
據報引述委內瑞拉教練杜達美爾（Rafael Dudamel）指：「賽前一晚有啲女人喺酒店熠熠揚揚，我哋唔覺得對手出呢啲老土招數好出奇，最緊要係班球員冇中招。」其實以巴拉圭同委內瑞拉嘅實力差距，應該就唔使出陰招嘅，最後巴拉圭輸埋一齊出局，都算係自己捉蟲！