各位高爾夫球迷有福了！事源擁有火辣身材、長長金髮嘅24歲美國高球手施芭蘭歷（Paige Spiranac），日前喺IG宣佈自己將會擔任2018年杜拜沙漠精英賽（Dubai Desert Classic）嘅開波司儀，佢把嗲聲到時實引死唔少男高球手，唔知到時會唔會搞到佢哋連手都軟埋？
唔理打波叻唔叻，施芭蘭歷的確係IG女神，佢個戶口經有120萬人follow。為咗保留粉絲，佢周不時會擺啲性感相上去，搞到啲人流晒鼻血。
杜拜沙漠精英賽將喺明年1月25至28日舉行，場地為杜拜酋長高爾夫球會所。另外，37歲西班牙球手沙治奧加西亞今年二月喺賽事贏得冠軍，而佢都講明出年會全力衛冕。