英國《每日電訊報》報道，哥倫比亞前鋒法卡奧同埋秘魯中場連拿度達比亞承認，喺禮拜二晚踢成1:1嗰場世盃外南美洲區有「溝通」過，大家知道場波打和嘅話就一家便宜兩家着！報道引述法卡奧話：「我哋知道其他比賽賽果，所以我嘗試將呢個訊息話畀秘魯球員聽。」喺飛燕諾搵食嘅連拿度達比亞承認有咁嘅事：「最尾五分鐘，法卡奧話我知場波打和嘅話大家都出線。」
至於美斯連中三元帶領阿根廷反勝厄瓜多爾出線後，喺更衣室罕有咁大玩激情，赤膊企上長凳高舉雙手，帶住阿根廷上下職球員高歌，十足十1986年世盃決賽馬勒當拿率阿根廷打低西德捧盃後一樣。
美斯以前成日俾人話性格內向冇領袖風範，不過今次喺中堅馬斯真蘭奴嘅ig片段見到，30歲嘅美斯似乎適應晒阿根廷隊長兼老大哥嘅角色，場上入三球，返到更衣室仲領唱愛國歌曲，據指歌詞包含「大家都係自豪嘅阿根廷人」咁，夠晒激情呀！
