【蘋果》專訪】中英混血兒何慈茵（Charlene）出身洪拳世家，今年再度挑戰ViuTV綜合格鬥真人騷《G-1格鬥會》第二季，第一季挑戰賽輸給郭思琳失去金腰帶，對於第二季，Charlene在接受《蘋果》專訪時表現得充滿信心：「我仲有乜嘢可以輸箒，唔緊要啦！贏又好，輸又好，我𠵱家都返咗嚟啦！」
「讓佢係侮辱佢」
早前Charlene在日本進行第二季第一場比賽，對戰女特技人蔡嘉燕（Mon），事後對方在網上大呻被Charlene狂毆百拳，慘變豬頭，又暗寸Charlene賽前詐病，她反擊說：「如果讓佢，我覺得侮辱咗佢。拳腳冇眼，好難避免唔受傷，加上比賽搶分係攻擊頭部。Mon姐嘅背景好強，學咗十幾年空手道，又係教練、專業特技人，論背景，佢比我有過之而無不及。佢有咁豐富嘅武術底子，我冇諗過比賽時佢唔作出適當嘅抵擋。佢話我過百拳只打眼，如果係真嘅話，點解佢唔作出防守，咁易畀對方打到同一個地方咁多次，我一直只係認真對待每一場比賽，唔通咁都有錯？」
對手重20KG
進入最後四強的Charlene，下一場賽事對手余智嘉身形龐大，她說：「對手實力超凡，對我嚟講係一個好大嘅挑戰。其中一位對手重我20公斤，教練都極度反對我應戰，體重差別太大，冇可能對戰，仲會好危險。但答應咗參加呢個節目，唔想輕易話退出，𠵱家要爭取時間積極備戰。」
採訪：羅慧敏
攝影：沈健程
場地提供：Pow Muay Thai and Fitness