特首林鄭月娥作為香港首個女特首，稱銜同過去嘅特首都會有分別，雖然行政署曾經發出總務通告教大家點稱呼特首，不過好多議員仍然改唔到口。噚日娥特出席立法會答問大會，就有議員稱呼娥特為「特首先生」，又有人唔知應該叫林鄭做「鄭特首」好，定叫佢做「林特首」好，場面非常搞笑。
噚日娥特出席答問大會，工黨張超雄就要求林鄭關注有特殊需要兒童嘅需要以及為長者提供社區照顧服務時，但張超雄提問時似乎有少少緊張，一開口稱呼娥特做「局長」，又改口叫「呀呀呀，特首先生」、「呀呀呀，夫人呀」引來會議廳小騷動。好在張超雄都冇被影響，繼續提問。
郭家麒$300諷交津被笑
正所謂一不離二，隔一陣叫錯稱謂嘅事又再發生。隨後發問嘅工聯會郭偉强提問外勞問題時，就將娥特稱呼為「林特首」，要工聯會黃國健提醒，話係「鄭特首」先啱，郭偉强惟有以「鄭特首又好，林特首又好」打圓場喇。可惜波波噚日冇到場，唔係可以問吓佢點睇。
噚日嘅答問大會原定12點正就完結，不過主席梁君彥要求娥特留多5分鐘，畀公民黨郭家麒可以問埋，點知郭批評林鄭月娥用每月300港元交通津貼收買人心，更拎住300元現金行前想交畀林鄭，林鄭笑住講「你有行賄之嫌喎」，又否認被收買人心。至於娥特衣着方面，前日一日換三套旗袍嘅娥特，噚日冇再着旗袍登場，反而身穿黑色西裝外套配淺藍色低領衫，再重複搭配噚日都有戴過嘅珍珠項鏈。
李八方