八方之前寫過，嶺南大學向有「深水埗明哥」之稱嘅陳灼明頒授榮譽院士，表揚佢造福社會嘅貢獻。嶺大噚日舉行「榮譽院士頒授典禮2017」，為明哥、女足球教練陳婉婷（牛丸）等5名傑出人士舉行頒授儀式。嶺大介紹明哥嘅讚辭話，原來明哥所以立志行善，同佢細個時候家境貧窮有關，明白低下層生活困苦，所以佢1997年接手北河飯店，就算當時生意欠佳，佢仍記掛一班三餐難有溫飽嘅露宿者同貧困人士，堅持要賣廉價嘅飯盒畀佢哋，因為明哥仲記住以前窮嘅味道，𠵱家想盡力幫有需要嘅人。嶺大又希望借今次獲得榮譽院士，可以將用心幫社會嘅訊息帶畀年輕人，令人人都生活得更好。