身處開一個既得利益者玩晒嘅時空，可能都會比較憤世，而且人始終都有啲鋤強扶弱心態，啱啱踢完嘅世盃外，有啲傳統力量下年唔使去俄羅斯，不過見到埃及、冰島呢類好多年冇入過，甚至從來冇踢過世盃嘅國家隊殺入世盃嗰種興奮，同埋嗰種國民身份認同感，已經對世界盃充滿期待呀！
冰島（圖）嘅萬人啪啪啪，上年歐國盃已經成為球壇一大特色，佢哋今屆晉級世盃後當然再玩，相信好多球迷都睇過。不過背後其實仲毛管戙，考慮到呢場只係一場外圍賽，竟然都可以吸引到超過三個巴仙嘅國民去撐佢哋，幾咁誇張。試諗吓香港如果有同樣比例嘅人入場撐港隊，就會有成21萬人。
當然啦，冰島係咪真係咁多球迷冇人知，不過可以肯定嘅係佢哋對自己國家嗰份驕傲同自豪，足可超越唔少大國強國，而且佢哋唔係glory hunter，只係由心而發咁去支持自己嘅地方，唔使講咁多法例規舉。
另外一條瘋傳嘅片，就係「埃及美斯」穆罕默德沙拿射入絕殺12碼後，一個喺屋企睇電視嘅老人家激動到又喊又笑又拍枱，而且現場球迷等唔到完場即刻衝晒入球場慶祝，因為埃及自從1990年後就未踢過世盃，等咗咁多年終於出到一個沙拿做救世主。球迷嘅呢份激情，喺體育世界真係不可或缺，佢哋踢世盃，總好過再睇美國呢類球隊「妹吓妹吓」吖！
文：飛鴻