經過周二多場生死激鬥後，已決出23支有份出席明年世盃嘅國家隊，有部份意想不到嘅國家歷史性入到決賽周，固然可喜可賀，但小弟亦戥部份傳統強隊或近年喺大賽有好表現嘅國家隊缺席，甚至有啲係好受大眾歡迎嘅球星冇得亮相呢個舞台，感到可惜。
周二有兩支傳統強隊垂死掙扎，分別係阿根廷同荷蘭，結果前者總算臨死前翻生，大家未至於要失望到冇得睇球王美斯，但九死一生嘅荷蘭，最終就只能2:0贏瑞典，而呢個結果當然亦係意料中事。
洛賓入完兩球後宣佈退出國家隊，對佢算係一個較感安慰嘅謝幕，但以佢年紀，同今次冇入選嘅史奈達一早就應該退下，怪就怪橙軍家陣冇人接班，連續兩屆大賽都入唔到，要兩位老人家一齊孭埋呢隻鑊。
相比起荷蘭，智利（圖）同美國出局真係令小弟好意外。智利連續兩年稱霸美洲國家盃，今年又獲洲際盃亞軍，點知竟然入唔到世盃，仲唔跌破所有人眼鏡？最失望當然係冇得睇山神，佢下年就29歲，再過四年已經33，小弟懷疑都唔知佢職業生涯仲會唔會再出現喺呢個舞台；至於美國就更加意外，明明上周大勝巴拿馬4:0，以為前三穩陣喇，點知作客輸畀中北美洲區積分榜墊底嘅千里達，連第四位踢附加賽嘅資格都冇埋；唔好話小弟政治敏感，唔通成班美國球員係驚今次去完俄羅斯，返唔到家鄉？
文：盧卡東尼