奶媽操刀嘅第一份施政報告噚日出爐，大家收唔收貨先？《蘋果》請嚟青年新政游蕙禎、新界金句王侯志強、中產女講師阮穎嫻同維園阿伯朱韶洪（大陸朱）講番幾句。一見面侯強已經大讚游B靚女，叫人做「BB」，又驚佢坐張高凳跌親，最尾仲車佢到車站㖭！大家冷靜啲，同車仲有其他嘉賓嘅。
出名多地皮嘅侯強講到首置上車盤，侯強叫年輕人唔好急住買樓，「你諗住打份工賺錢去買樓就冇乜可能㗎喇，個個人機會唔同，機會一嚟想唔買都難！」言下之意咪即係叫年輕人等運到，時辰未到都唔好諗置業。講講吓侯強叫林鄭唔好畏首畏尾，「唔好似以前嗰啲開咗5年期票之後交唔到功課！」邊個咁曳呀？「你睇過去梁生點交吖？講咗做唔到，咪即係冇交囉！要罰打籮柚！」