澳洲黃金海岸昨起（10日）一連兩日有兩歲可出賽馬匹拍賣會舉行，個別練馬師如葉楚航及暫時帶頭的阿Chris蘇偉賢，都齊齊飛咗去當地為馬主入貨。
如冇變卦，佢兩個今晚（11日）將對谷草賽事進行遙遠控制，並肯定已經準備好晒所有東西，策騎指示用電話俾又好，用WhatsApp俾又好，人在異地都冇所謂。
航哥仲喺自己社交平台對外公佈，已經幫馬主以15萬澳元（折合91萬港元）購入來自一匹父系為「利得精選」的子嗣。佢仲話該駒於拍賣前試跑造出10秒49快時間，個人對呢匹兩歲仔好有信心。
至於今戰阿Chris出三駒，當第三場「開心再現」馬主吳耀國與陳善增，早在方廐養馬時已認識佢，大大話話有十幾年交情，固然想快啲交代。
另一邊廂，航哥有六Win向榜首亦步亦趨，呢晚佢有第五場「君子承諾」回師勝途及第六場「中華之光」加程再戰，都係擺明車馬全面搏殺。
圖片來源：Magic Millions