林鄭月娥由競選到上任，不停話要同各界connect，除咗佢同司局長要落區，一班年輕政助亦都無可倖免。八方聽聞，林鄭已經向政治助理落咗柯打，稍後要到訪學校巡迴演出，向學生們講解施政報告。呢份報告咁多涉及年輕人嘅事，無論學業、事業或置業，都有唔少篇幅，加上仲有年輕人入政府嘅自薦制度，由呢班普遍30零40歲嘅政助做宣傳大使，說服力可能都大啲嘅，但相信佢哋都要儲定子彈，萬一俾學生問到敏感議題，可以點樣回答，以免被問到口啞啞。政助中唔少人噚日亦有出席立法會聽取施政報告，特首辦特別助理李惠亦跟大隊現身。