於前日播出嘅韓國tvN綜藝節目《名單公開2017》中，盤點咗「最快還清債務嘅藝人」，當中同樣24歲嘅「國民妹妹」IU及女團A Pink成員鄭恩地亦榜上有名，更被標籤為「孝順藝人」。
「國民妹妹」IU獲節目選為第4名，據知IU小時候因為媽咪誤做債務擔保人，搞到負債纍纍，要靠外婆變賣首飾維持生計，甚至有段時候寄住喺親戚屋企，受盡冷嘲熱諷，度過一段艱難嘅日子。而為咗養活全家，IU於2006年決心做歌手，開始去各大娛樂事務所面試，雖然曾經受騙，但最終於翌年簽約Loen娛樂，以16歲之齡出道獲封「國民妹妹」，2010年憑《好日子》爆紅。除咗歌唱事業，IU仲有多個廣告邀約，又涉足綜藝節目劇集，單單2011年，IU收入就有逾100億韓圜(約6,882萬港元)，出道3年就還清父母嘅債務。
至於恩地於2011年19歲時以A Pink成員身份出道，但2012年憑tvN人氣劇《回答吧！1997》先大開知名度，隨後因精湛演技大獲好評，以每集1千萬韓圜(約6萬8千港元)身價拍劇，再加上專輯、演唱會亦有唔少進帳，不過恩地每次都將大部分嘅錢拎去還債，最終於出道3年後還清父母所有貸款。
而被節目選為冠軍嘅就係46歲主持人申東燁，據知申東燁曾於2005年開過娛樂事務所，但遭拍檔出賣，之後做鞋嘅事業又失敗，因欠下巨債而陷入低潮，不過佢憑近年憑《SNL Korea》系列東山再起，短短4年還清幾十億韓圜嘅債務，仲有餘錢買樓投資。