林鄭首份處女作大開水喉，坊間評價不俗，有政商界留意到，阿姐嘅好打得作風，喺報告表露無遺，包括有啲新成立嘅委員會都由佢親自揸旗，例如主持政府內部成立嘅「創新及科技督導委員會」推動創科發展，同時又成立「行政長官創新及策略發展顧問團」，以取代現有兩個同樣由特首做主席嘅經濟發展委員會同策發會。
同時，林鄭亦會主持年度「行政長官高峯會」親自聽工作成果，就連月底嘅「稅務新方向高峯會」，佢都話明會出席。明年中先成立嘅「兒童事務委員會」，原來已經喺上月成立由林鄭親自主持嘅籌備委員會咯。聽到呢度，大家係咪都feel到，女特首好多嘢都攬上身？