快活谷今晚(11日)有位騎師開局好快活,就係炒飯哥羅理雅,繼頭場勝出沈集成馬房「泡泡達人」後,羅理雅於第三場四班1200米再下一城,勝出容天鵬馬房大熱「中華壹號」,此駒打開今季勝門,單Win及組合獨贏A1分別派33.5及19元。
雷神這晚停賽,大部份騎師包括羅理雅在內,多多少少因冇咗強敵,陣上搏殺份外得心應手。羅理雅便打出近期身價波,「中華壹號」沿途居中,在其理想留放下直路殺上贏1.5馬位,順利建功,個人用咗短短一粒鐘,已成功起孖領先騎師王。
7歲愛爾蘭自購馬「中華壹號」上季尾於同班同程輕取今季已兩捷的「紅星」開齋;上周四(5日)晚「中華壹號」只不敵超班馬「航天勇將」做阿二,果然今場對手減弱即贏馬補中,從而帶挈馬主新季首度拉頭馬。
容天鵬表示「中華壹號」於延遲截止報名階段加入,因為知道四班1200米分開了兩組,對手應比較弱,所以趁馬fit報名匆匆再出,上場形勢不好只輸埋門一步,今場步速甚慢都有點擔心,好彩羅理雅發揮出色,走位一絕下後上取勝。
28歲無綫女藝人陳芷尤,這晚身穿一身黑衫,與其他女藝人如白雲等,以及「得意財星」馬主之一的施龍友,一齊現身支持第三場「自由飛翔」及第五場「領航大師」,結果「自由飛翔」4.9倍只得第六名,「領航大師」亦告落第,一班人打氣失敗,冇得拉頭馬。
第三場賽果正路,次熱「富萬家」由巫顯東靠放入Q,落飛馬「軍炮」後追第三,冷馬「哥哥仔」跑第四,四重彩派14,437元。