冠軍級練馬師告東尼季初成績唔好，今晚（11日）谷戰賽前只贏過一場頭馬，直到第六場三班一哩告東尼終於發威，起用較少合作的祈普敦爆冷勝出「大運起」，此駒同時令豪氣馬主潘蘇通新季首度贏馬，單Win及組合獨贏A3分別派216.5及21元。
「大運起」是四歲英國自購馬，來港前三戰兩勝一負，包括贏出一場1400米表列賽，本身上季評85高分在港起步，八戰過後卻零獎金，上賽初跑谷草夥拍蔡明紹更於三班一哩包尾，表現相當不濟。
這晚「大運起」換上祈普敦再戰同程同班，沿途守在內欄留在第五位競跑，末段發力一衝過晒，本身在港首次上名即爆冷開齋，祈普敦近七個賽日六次有馬贏。告東尼連同9月20日爆58倍Win「華美之友」，馬房季內兩捷均於谷草夜馬贏冷門，沙田仍未開齋。今次同時係告東尼與祈普敦歷來首度合作贏馬。
告東尼準新抱，即兒子告崇恩女友莊思華（2010年港姐季軍莊思明孖生姐姐）越來越融入告氏一家，之前「華美之友」獲勝及今場「大運起」，都見莊思華在場做得力助手，助告東尼打點一切，齊齊拉頭馬。
第六場賽前有小風波，9號「紅運爵士」衝閘而出跑了一段途程，並令騎師楊明綸撞閘受傷，人馬雙雙退賽，後者餘下場次亦不能上陣。根據規例，孖寶、三T投注了「紅運爵士」一概轉投大熱門1號「中華之光」，結果「中華之光」三甲不入，遂全部當輸。
第六場二至四名分別為「慣勝共贏」、「明月光」及「情趣」，四重彩派八萬五千幾，三T正獎有人中，每注派180萬幾。