臨近年尾，球壇兩大個人獎項──國際足協世界足球先生同歐洲金球獎花落誰家將先後揭盅。當中俗稱「歐洲足球先生」嘅金球獎（Ballon d'Or），主辦單位啱啱喺周一公佈30人候選名單（見附表）。大熱球星好似基斯坦奴朗拿度（C朗）、美斯同尼馬唔使講梗係有份，但同時有唔少新面孔加入競爭，包括熱刺前鋒哈利卡尼、車路士中場尼高路簡迪以及利物浦翼鋒沙迪奧文尼等。
哈利卡尼唯一英軍
C朗今年帶領皇馬先重奪西甲冠軍，再破天荒蟬聯埋歐聯；相反美斯所屬嘅巴塞隆拿只係贏個盃仔西班牙盃冠軍，佢帶領嘅阿根廷國家隊成績又咁差，勝算真係唔大。歐洲金球獎喺2010年開始一度同國際足協世足先生合併成為國際足協金球獎，到2016年度分家，C朗喺上年分別帶領皇馬同葡萄牙國家隊，贏得西甲聯賽同歐國盃冠軍，結果以745高票當選，拋離得316票嘅美斯。計贏金球獎次數，美斯暫時以五次領先C朗嘅四次，不過睇嚟好快又會打成平手。30人候選名單嘅新力軍，雖然勝算唔高，但佢哋喺今年嘅表現確係好精采，其中熱刺嘅英格蘭前鋒哈利卡尼入球停不了，九月狂入13球之後，進入10月繼續有波入，代表英格蘭國家隊兩場都建功。
此外，小C朗（Cristiano Ronaldo Jnr）似乎都好有潛質承繼C朗衣缽。英國威廉希爾博彩公司日前為C朗囝囝開盤，小C朗他日可以喺皇家馬德里或者曼聯嘅正式比賽上陣，賠率有成101倍；唔止C朗大仔，連佢最近出世嘅一對孖生BB都有份，是但一位可以代表皇馬或曼聯喺正選比賽上陣，賠率一樣係101倍。
美斯爭金球獎勝算唔高，近排仲要為阿根廷國家隊爭出線世盃煩惱，唔知佢會唔會想轉吓新環境。有報道指曼城準備喺明年一月冬季轉會窗開價四億歐元（約37億港元）斟美斯。不過亦有報道指巴塞會等到季後先行動，上屆金球獎第三名基沙文同馬德里體育會嘅合約違約金，明年七月一日會自動下降到一億歐元（約9.2億港元），到時巴塞就會出手直接收購。
求驗客