林鄭一改過往特首對施政報告密密實實嘅作風，噚日開行會前率先預告方向，仲騷埋個藍色封面畀大家睇，搞到今日正式出爐嘅報告，少咗好多神秘感。而處女作出爐前夕嘅佢，心情大好噃，仲笑稱打破慣例唔會逐字宣讀呢個建議，係行會成員建議、佢接納咗，笑指「我諗佢哋都係擔心坐喺公眾席會瞌眼瞓」。睇番過往特首喺立法會讀施政報告，公眾席嘅行會成員、會議廳上嘅議員都不時大模廝樣搵周公，放蚊嘅比率好頻繁，林鄭呢個決定，相信令攝記少咗好多捕捉有趣鏡頭嘅機會。唔知第一先生林兆波及林鄭長子節思，今日會唔會去立會撐場打氣呢？
