前政務司長陳方安生媽媽方召麐係國畫大師，早排亞洲協會香港中心就為方召麐舉行為期3個月嘅「道無盡：方召麐水墨書畫展」，陳太噚日同八弟方津生醫生向傳媒介紹媽媽作品。陳太話呀，媽媽方召麐幾經波折仍冇放棄習畫，係女中豪傑方家典範，盼本港青年，學習其母熱愛祖國、熱愛香港。
曾隨張大千學畫
陳太話，其母方召麐係典型賢妻良母，煮飯整衫作畫都好有天份，佢同孖生妹妹方寧生幼年時嘅衫，就係由媽媽親手縫製。佢又話，自己做政務司司長時工作不愉快，擔心唔可以令官員平穩過渡時，就會同媽媽傾訴，佢由媽媽身上領悟到有容乃大，同埋退一步海闊天空嘅道理，亦得到無限鼓勵。陳太最欣賞媽媽嘅作品，原來係創作於1970年嘅《泛舟絕壁下》，因為畫作有獨特意境。
至於方津生就曾經跟媽媽學畫畫，佢話細個時媽媽會叫佢畫吓人像，畫得好媽媽就會題字，佢亦會為媽媽磨墨同印印泥。而方津生最欣賞媽媽嘅作品則係1988年嘅《黃河》，覺得作品用咗唔同技巧、亦糅合唔同派別畫法，代表咗媽媽獨特嘅藝術風格。佢仲話，媽媽有句座右銘：「守拙成吾道，幽居近物情」，即做人要安於愚拙，先可感受事物，對佢做人影響深遠。
方召麐曾經跟隨國畫大師錢松岩、趙少昂及張大千學習，係近代少有嘅女性國畫大師。今次展覽將展出方召麐唔同時期嘅48幅作品、18個印章以及一批舊照，展覽即日起喺亞洲協會香港中心麥禮賢夫人藝術館展出，展期至12月31日。
李八方